தூத்துக்குடி சிவன் கோவிலில் அமைந்துள்ள ஸ்ரீதேவி பூதேவி தேவி சமேத வைகுண்டபதி பெருமாள் கோவிலில் ஆண்டுதோறும் வெகு விமர்சையாகக் கொண்டாடப்படும் வைகுண்ட ஏகாதேசி திருவிழா, இந்த ஆண்டு கோவில் கும்பாபிஷேக பணிகள் நடைபெற்று வரும் நிலையிலும் சிறப்பான ஏற்பாடுகளுடன் பக்தி பரவசமாக நடைபெற்றது.
திருவிழாவை முன்னிட்டு அதிகாலை 5 மணிக்கு கோவில் நடை திறக்கப்பட்டு, வைகுண்டபதி பெருமாளுக்கு சிறப்பு அலங்காரம் செய்யப்பட்டிருந்தது. அதனைத் தொடர்ந்து கோ பூஜை நடைபெற்றது. பின்னர் வைகுண்டபதி பெருமாளுக்கு சிறப்பு அலங்கார தீபாராதனை நடத்தப்பட்டது. இந்த அனைத்து பூஜைகளையும் கோவில் பிரதான பட்டர் வைகுண்ட ராமன் சிறப்பாக செய்து வைத்தார்.
பூஜைகளுக்குப் பிறகு திரளான பக்தர்களுக்கு பிரசாதம் வழங்கப்பட்டது. வைகுண்ட ஏகாதேசியை முன்னிட்டு பெருமாளை தரிசிக்க ஏராளமான பக்தர்கள் கோவிலில் குவிந்தனர். பக்தர்கள் எந்தவித சிரமமும் இன்றி வைகுண்டபதி பெருமாளை தரிசனம் செய்யும் வகையில், கோவில் நிர்வாகம் சார்பில் தடுப்புக் கம்பிகள் அமைக்கப்பட்டு, நீண்ட வரிசையில் பக்தர்கள் ஒழுங்காக நின்று சாமி தரிசனம் செய்து வருகின்றனர்.
கும்பாபிஷேக பணிகள் நடந்து கொண்டிருந்தாலும், திருவிழாவின் பக்தி உற்சாகம் எவ்விதக் குறையும் இன்றி காணப்பட்டு, கோவில் வளாகம் முழுவதும் ஆன்மிக ஒளியில் திகழ்ந்தது. இன்று முழுவதும் பக்தர்கள் பெருமாளை தரிசிக்க வசதியாக கோவில் நடை இரவு 9 மணி வரை திறந்திருக்கும் என கோவில் நிர்வாகம் அறிவித்துள்ளது.
வைகுண்ட ஏகாதேசியை முன்னிட்டு “வைகுண்டம் திறந்த நாளில் பெருமாள் அருள்” என பக்தர்கள் மகிழ்ச்சியுடன் கோவிலுக்கு வந்து, குடும்பத்துடன் தரிசனம் செய்து சென்றனர்.
